Wjerški k jutram

Jutrowny program SLA

Folklora a rejowana bajka za dźěći

Wosebje mnohostronski je program Serbskeho ludoweho ansambla k jutram. Wot rejowanej bajki za dźěći hač k woblubowanym folklornym programje sahaja wjerški za młódšich a staršich na žurli SLA. Nimo toho prezentuja ansamblowcy na jutrownej njedźeli k prěnjemu razej modowu přehladku serbskich drastow na Hrodźišku.


"Moja reja!" - woblubowany folklorny program                                            

„A ženje ja njejsym tak wjesoły był“ zasłyšiće hnydom na spočatku tutoho impozantneho folklorneho programa. A runje tole chcedźa tež hudźbnicy, rejwarjo a spěwarjo SLA ze swojimi rozžahłymi poskićenjemi publikumej sposrědkować. Nimo wobkuzłacych zwukow chóra a orchestra zahorjeja předewšěm temperamentne reje, jedna kaž druha pochadźaca wot něhdyšeho šefchoreografa SLA Juraja Kubánki. Hižo mjena, kaž  „Dwuskokowa“  abo „Třepotata“ pokazuja na intensitu ze spěšnymi kročelemi, mócnymi skokami a harmoniskimi figurami. Wěnc serbskich nałožkow kombinowany z profesionalnymi poskićenjemi na jewišću sčini tutón program jónkrótny.

termin: ćichu sobotu, dnja 20.04. w 16 hodź. na žurli SLA


„Na borće wěnčk je njewjesće króna“

Modowa přehladka serbskich drastow Hornjeje a Delnjeje Łužicy z moderaciju.

terminaj: jutrownu njedźelu, dnja 21.04. w 12.30 a 13.45 hodź. w Budyšinje na Hrodźišku.


„Ptačokwasny són“ – rejowana bajka za dźěći

Poprawom chcyše sej braška rjany a měrny wječor popřeć. Tu pak zakłapa naraz štó mócnje wo durje a sroka přismali cyle rozpjeršena do jstwy. Hižo dawno bě wona brašku wo to prosyła, zo by za nju  kmaneho nawoženju namakał. Termin za ptači kwas bě wšak hižo kruće zaplanowany a kwasna hosćina so přihotowaše. Tohodla je sroka chětro znjeměrnjena. Bjez nawoženje njemóže dźě kwas swjećić. Braška pak po zdaću scyła nuznje nima. Sydnje so woměrje na swój čumpaty stólc a sej zaso drěmnje.

Sroce tuž nažel ničo druhe njezwosta, hač sama za swojim nawoženju pytać. Kajku rólu při tym rubježnik Bobak hraje abo pokradnjeny čerwjeny parličkowy rjećaz, to zhoniće w lětušim ptačokwasnym programje, hdźež ansamblowcy spěwajo a rejujo  napjatu stawiznu z tójšto překwapjenkami předstaja.

termin: jutrownu póndźelu, dnja 22.04. w 16 hodź. na žurli SLA w Budyšinje.

Předstajenja

Telefonlisćiki a informacije:(03591) 358 111ticket©sne-gmbh.com
22. apryl 2019
16.00 hodź
SLA Budyšin