Zymski čas

Scenisko-koncertantny adwentny koncert z orchestrom, chórom a baletom

Ničo njezamóže nas rjeńšo do hodowneho časa přewodźeć hač wulkotna hudźba. W scenisko-koncertantnym programje “Zymski čas”, z orchestrom, chórom a baletom Serbskeho ludoweho ansambla, zjednoća so najrjeńše twórby adwentneho časa ze zymskimi nałožkami Serbow. Při tym zaklinča sławne němske a mjezynarodne hodowne melodije runje tak kaž rarity serbskich komponistow. W prěnim dźělu programa nastupitaj chór a orchester mjezynarodny terrain. Při tym słyšiće znate hodowne spěwy kaž »Cum sancto spiritu« z „Gloria“ Antonia Vivaldija kaž tež jimacy »Mary, did you know« (ar. Andreas Pabst). Klasiske hodowne spěwy kaž »Ow najwjeselši« abo »Marija šła přez ćernjow lěs«, kiž zaklinči wotměnjace w němskej a serbskej rěči, njeměli pobrachować. Suiće zymskich spěwow komponistow Dietera Kempy a Alfonca Jancy podatej fascinowace dohlady do Serbskeho hudźbneho swěta. 

W druhim dźělu wěnuje so program SLA zymskim nałožkam Serbow. W nocy k dnjej swj. Handrija, poslednjeho dnja w nowembrje, je so přez wšelakore lubosćinske orakle přichod młodych, njewudatych holcow postajił. Dalši nałožk je tež dźensa hišće w Slepjanskej kónčinje hišće aktualny. Do hód so přazna rumnosć wosebje derje wurjedźi. Bože dźěćatko, přewodźane wot młodych předźerkow, přepoda dźěćom na adwentnych njedźelach małke dohodowne dariki. 

Wjesoła a měrna hudźba, pisane drasty a wulkotna atmosfera přewodźa přez adwentny čas a skrótša čas k patoržicy. Moderatorka Kristina Nerádowa wudospołni předstajenja rejowarjow, spěwarjow a hudźbnikow a wjedźe publikum přez wječor.




Nowinarske referency




ideja a koncept: Jan Domaška

režija: Jan Domaška a Kornel Kolembus

režijowa asistenca: Alena Farkašowa

hudźbny nawod: Andreas Pabst

sobuskutkowcy: orchester, chór, baletny porik

moderacija: Kristina Nerádowa

teksty: Kito Lorenc m. d.

 

Předstajenja

Telefonlisćiki a informacije:(03591) 358 111ticket©sne-gmbh.com
16. december 2018
16.00 hodź
Slepo
Telefonlisćiki a informacije:(03591) 358 111ticket©sne-gmbh.com
22. december 2018
17.00 hodź
Budyšin, SLA