Stawizny

Ansambl, dźensa spěchowany wot Załožby za serbski lud, bu 1952 na iniciatiwu Domowiny załoženy. Tři profesionelne sparty, balet, chór a orchester, wěnuja so zdźerženju wulkeho bohatstwa serbskeje folklory. Zdobom ju dale wuwiwaja a z wurazowymi srědkami moderneho jewišćoweho wuměłstwa zwjazuja. Při tym su žiwe nałožki zakład a inspiracija za jónkrótne wobsahi ansambla. Tute sahaja wot hudźbnych bajkow za dźěći hač do hudźbneho a rejwanskeho dźiwadła, chórowych programow a koncertow.
Turneje wjedźechu SLA do wjace hač 40 krajow na štyrjoch kontinentach. Hłowne skutkowanišćo pak wostanje dwurěčna domizna.